الداعي نيوز/ مقالات

خلي نسولف بالعامية…
وخلوني احچي الي بگلبي ويجوز يطلع نفسه الي بگلبكم لأن مثل ما يگولون الهموم سواجي، اي اعرف گلبت المثل بس هو هذا واقع الحال في العراق وابشرك بكل شرائح المجتمع الا بشريحة ( ابو المال ) ذول الي تروح حكومات وتجي حكومات وهم حاطين رجل على رجل والمالات توصلهم والشعب هو الممنون.. 

ما علينا وخلونا نحجي بسوالف الطوبة احسن ما يسونا طوبه بالقانون المفصل على كدهم .. طبعاً گضينا حياتنا نبارك للعالم من 2007 وانتَ جاي ولا احد باركلنا لأن كل شيء ما حققنا وأمشي عليك الله وكتبه ورسله ( عوفونا من بطولات الفئات العمرية الي كلنا نعرف شلون اخذناها ) واليزعل خل يزعل ..!

نبقى هيج !؟ لا عمي .. ما طول رئيس الوزراء و رئيس مجلس النواب يباركون للاشقاء وللاصدقاء من يفوزون بالمونديال يعني انتم رياضيين وتعال اگلكم انتم اكيد هم  تريدون الوادم يباركولكم !؟ 

زين، خلونا نحط گدامكم سالفة برأسها 60 حظ مثل ما يگول ابو العلا المعري الشعبي، وهي مشروع ( المركز التدريبي للمنتخبات الوطنية ) بس تحتاجلها فلوس واحنا اكثر شيء عدنا الفلوس بالعراق ( بس مو بيد الفقراء طبعا ) ومنها انتم هم اهتميتوا بالشباب و منها ساهمتم بتطوير كرة القدم وشرط اخلي شريط الافتتاح 100 متر وكل واحد يساهم انطيه مقص!.

المركز ارضه موجوده ( المجمع الشبابي ) و الرسومات الهندسية هم موجودة ( لفيف من مهندسينا الشباب المبدعين ) والاتحاد الآسيوي راح يساهم بنص الفلوس، الي هم اساساً وادم غربة والنص الباقي عليكم انتم ولد الديرة .. علماً ان كلفة المشروع الي يضم ( 3 ) ملاعب و قاعات جم ومسبحين ومباني ادارية وفندق للاقامة لا يتجاوز الـ12 مليون دولار بدون بوگ وتخنصر طبعاً كباقي الملاعب !

ها ورحمة الوالديكم اكو شغلة يرادلها استثناء وهي اصدار الاوراق الرسمية للاعبينا المحترفين مو تنشلع گلوبهم وكتابنا وكتابكم حتى نگدر نصدر الوثائق خصصونا واحد من رئاسة الوزراء يحجي بسم السيد السوداني والسالفة التخلص بسنة نخلصها باسبوع وابوك الله يرحمه.